Goed gekoring op die JSE…

Die oorsese aptyt vir beleggings in Afrika is steeds sterk. Die jongste bewys hiervan is ’n ooreenkoms tussen Euronext en die JSE waarvolgens Euronext ’n lisensie vir sy koringtermynkontrak aan die JSE toegeken het.

’n Termynkontrak is ’n ooreenkoms om ’n kommoditeit of ander beleggingsinstrument op ’n vasgestelde datum teen ’n vasgestelde prys te koop. Dit help onder meer die produsente van landbouprodukte soos koring en mielies om hulle beter teen risiko te verskans.

Chris Sturgess, direkteur van kommoditeite van die JSE, sê dié ooreenkoms met Euronext beteken dat kliënte van die JSE nou maklik toegang tot die Europese koringmark kan kry.

Euronext se afgeleide instrumente, insluitend landboutermynkontrakte, is nou sy vernaamste produk ná sy ontbondeling verlede jaar van Intercontinental Exchange.

Die beursgroep se koringtermynkontrak word uit Parys verhandel. Euronext sê in ’n verklaring hy wil sy voetspoor in die snelgroeiende Afrika-mark vergroot.

Volgens voorspellings van die Internasionale Monetêre Fonds (IMF) sal dié kontinent se ekonomiese groeikoers volgende jaar 5,75% handhaaf – die tweede vinnigste ter wêreld.

Die JSE sal Euronext se termynkontrak vir gemaalde koring (milling wheat) noteer.

Please follow and like us: